هذا موقف صار معاي مع سينمتنا العزيزة Cinescape الي صراحة انصدمت من تعاملهم والي كنت امدح فيها وافتخر فيها ،،
بس بعد ما شفت الي شفته صراحة ما توقعت منهم يقصون عالناس جذي ويبوقون فلوس اشكرة !
الموضوع : يوم الاثنين قبل اسبوعين بتاريخ 17-8-2010 حجزت انا والشباب الي تقريباً فينا 8 اشخاص يعني المجموع كله 12 دينار وكلنا ندري انه الاثنين سعر التذكرة 1.500 دينار يعني نص السعر
فـ دخلت على موقعهم كالعادة الي صارلي سنة ونص وانا اتعامل معاهم بهالطريقة شحنت البطاقة 12 دينار عن طريق الكي نت وانا قاعد اختار الاماكن بوقت ما حجزت وأكدت الحجز صار في خلل بالموقع يعني لااااق !
المهم جيكت مره ثانية اشوف اذا الاماكن انحجزن وله راحت .. انا توقعت الخلل انه صار تصادم في حجز الاماكن بين وبين واحد ثاني المهم قلت لا لازم اجيك على رصيد البطاقة يمكن انا غلطان .. الحساب نفسه ما تغير ولا تحرك شي وانا ما اتأكد اني حاجز الا لمن يطرشولي مسج اني أكدت الحجز فـ نطرت تقريبا ربع ساعة ما صار شي ولا دزوا مسج !
والي خلاني اتأكد انه مو انا الي حاجز الرصيد نفسه ما تغير يعني ولا جنه صاير شي
انا قمت وحجزت اماكن غير الاماكن الي اخترتها وكل شي اوكيه وتأكد الحجز وكان الله غفور رحيم
المشكلة مو هني المشكلة رحت السينما يم المكينة الي تطلع منها الحجز .. قبل لا تطلع الاماكن المحجوزة طلعلي الاماكن القديمة الي كنت حاجزها انا هني .. قلت شلون انا حاجز 8 كراسي والي الاماكن المحجوزة 18 كرسي !
شدعوة لو عيد ميلاد مو جذي .. ! المهم انا طنشت السالفه واخذت التذاكر الي حجزتهم وشفت الفلم وكان الفلم اسمه Echelon Consp
صراحة فلم كان اداء ممتاز بس النهاية كانت شوي بمالغ فيه .. وتقييمي للفلم 7/10 يعني حليو
المهم مر اليوم والي بعده وصار اسبوع ... الشباب قالوا بما ان الاسبوع الي وراه راح يصكون السينما عشان العشر الاواخر وبعدها العيد شرايكم نروح السينما .. انا قلت اوكي مو مشكلة قتلهم انتوا حجزوا الاماكن واشحنوا البطاقة وسووا كل شي انا اييكم عالموعد
لأن انشغلت بموعد مع اتحاد الطلبة الي بالخالدية لتدريب الطلاب على المقابلة الشخصية لكلية الحقوق فـ كان المكان قريب من سينما الافنيو الي بروحلها ،،
مو هذا موضوعنا .. انا خليت كل شي ورا الشباب واهما يسوون كل شي .. فجأة دق علي ولد خالي قالي بدر رصيد البطاقة -3.000 دنانير .. قتله شلون ؟ .. قالي مادري انا عبيتها 9.000 دنانير وقالولي الرصيد -3 ؟؟ شسالفة اكيد صاير شي
دقيت على ارقام سينسكيب الموقرة .. كلها مشغولة !! يمكن حوالي 20 مره او اكثر وماكو فايدة .. حسسوني انهم يوصلون طلبات ؟؟
كلمت ولد خالتي قتله انا اروح الافنيو واجيك عالموضوع واشوف شصاير معاهم .. بعد ما خلص اللقاء توجهت على طول الافنيو
رحت للعلاقات العامة وسئلتهم وكان الحوار :
انا : السلام عليكم
الموظف اسمة محمد الشمري : وعليكم السلام
انا : يعطيك العافية اخوي انا قبل اسبوعين .. كيت وكيت وكيت
هو : اخذ البطاقة مني وشاف الرصيد سالب ثلاث دنانير !! قتله ادري ابي الحل الحين شنو انا حجزت قبل اسبوع والخلل كان منكم انا شنو ذنبي
قال : عفواً .. هذه سياستنا في الاخطاء .. انت لازم تدفع 3 دنانير عشان يروح السالب ويرد الرصيد صفر !!
انا : انزين يابو الشباب انا شذنبي اذا انتوا الي الي صار منكم الخلل عمرها سينسكيب ما تقدر اتحجز اذا كان بالبطاقة ما فيها رصيد شلون يصير سالب بالعقل يعني !
هو : جان داق بنفس اليوم الي حجزت فيه ومتفهمين الموضوع وقايلنا
انا : ( بعصبية )... مو فوق الـ زليون رنة ولا راضين تشيلون
هو : انزين لو بنفس الوقت الي طلعت منهم التذاكر قايلنا
انا : انزين مشكور ويعطيك العافية وسامحنا اذا ازعجناك
الخلاصة : صراحة ما توقعت منهم انهم جذي اهما يغلطون ويركبون الغلط فينا ! .. الله كريم
وسامحوني اذا طولت عليكم بالحجي بس كنت محترق وانطفيت :) لووول
