بسم الله الرحم الرحيم ..
بلا شك اغلب مستخدمي الانترنت في الكويت يستخدمون الـ " DSL " لسرعتها الكبيرة في تصفح المواقع وقدرة استيعابها على تحميل الملفات الكبيرة !!
كثير من الناس بعد ان قرر الاشتراك على الـ " DSL " وقف يتسائل ... اي شركة افضل او من الافضل في تزويد مستخدمي الانترنت السرعة والخدمة المميزة ؟؟
هذا سؤال اكيد الكل سئله نفس بلا استثناء لانه السؤال الاول الي يجمعنا ومن ثم نختلف في اجابته !!
اولاً : لماذا هذا الموضوع ؟؟ ... بصراحة سينتهي اشتراكي السنوي بخدمة الـ " DSL المنزلي " هذا الاسبوع تحديداً بتاريخ 7-9-2010 فـ لازم اجدد اشتراكي ...
ثانياً : انا من مستخدمي الـ " QualityNet " ... بصراحة كواليتي نت شركة رائدة وعريقة في تقديم الانترنت في وتزويد مستخدميها افضل العروض التنافسية بالاضافة حلها لمشاكل الانقطاع الاإرادي بسرعة وعدم جعل المستخدمين يتقاعسون منها ..
وكثيراً من مستخدمي " Qnet " تعرضت شبكاتهم للإنقطعات الاإرادية بسب المشاكل في توصيل الكيبلات الى الخليج .. بس شنو نسوي قاعد يسون الي عليهم قدر الامكان
فـ انا اليوم قررت اكتب موضوع شامل عن ابرز العروض التنافسية من اكثر الشركات تداولاً في الكويت .. وسأبدء بـ " Qnet "
شرحت لكم في المقدمة انني اتعامل حالياً مع كواليتي نت ... لأني من 5 سنوات وانا تعامل معها ما فكرت في يوم من الايام اني اغيره .. ليش :
1- كانت ولا زالت من الشركات الابرز في خدمة المشتركين وتقديم الدعم الازم لهاا
2- سرعتها ثابته ومثل ما يقول المثل .. " لا يهزك ريح " خخخ
3- دعم العملاء جداً راقي يساعدون قدر الامكان وبوسه فوقهم بعد وسرعة استجابتهم لك .. كيف ،، اتصل فيهم بأي وقت يردون عليك وتقولهم ابي دعم العملاء يساعدني في تركيب الوايرات وجذي وابي اعادة تهيئة للمودم يعني من يد ويديد .. ويقعدون معاك لو ساعه كاملة واهم يشرحولك
4- هذه موقف ما انساه لهم اطلاقاً .. انتهى اشتراكي العام فتكاسلت وقلت اروحلهم بعد جم يوم .. العاده شغلي اول بأول بس ما رحت .. المهم كنت ابي اسوي شغله مهمه جداً من النت ولازم اشبك .. تذكرت انه اشتراكي انتهى ولازم اجدده .. فقلت ادق عليهم واسئلهم اذا مكان تجديد الاشتراك مبطل ولا لا .. مكانهم في " مجمع الخليجية " صوب شرق ومرقاب وبرج الحمرا وجذي .. فـ اتصلت عليهم قتلهم مبطل اليوم قالي لا اخوي اليوم مصكرين قالي حياك بالمنطقة العاشرة اعتقد فاتحين .. انا ما ادل شي هناك وما عمري رحت المنطقة العاشرة .. فـ قتله انا مستعيل اليوم لازم اشبك ما تقدر تخدمني بشي .. اذا عندك حساب بالبنك تقدر تريحك عمرك وتجدد اشتراكك عن طريق السايت وطريقة سهله اذا تبيني اساعدك مو مشكلة !
قتله الفلوس معاي كاش .. ان شاء الله اسويه عن طريق النت .. قالي من نفسه .. انا ببطلك الانترنت لـ اسبوعين تقدر تسلك امورك فيها لـ حد ما تجدد اشتراكك .. بصراحة احترمتهم وعزيتهم والله ويعطيهم العافية
واخليكم مع صورة تبين عروضهم للسنه هذه او الصيف هذا مادري بس يعني للقترة هذه ..
-------------------------
ما عندي خلفية عن هذه الشركة بس اعرف جم واحد يمدحها يقول عروضها زينة وخدماتهها قوية !!
دخلت عالموقوع احس اسعارهم مبالغ فيها وايد .. وهذه عروضهم لهــفترة ،،
----------------------
وهذه بعد ما جربتها بس عروضها وايد قوية .. من 2 ميغا وفوق يندبل من الساعة 3 الفير لـ 3 العصر يوصل لـ 24 ميغابايت بالثانية
يعني شي حلو .. يمكن اجربه .. وهذه عروضهم
----------------------
ثاني افضل شركة عندي اذكر كنت استخدمها قبل 6 سنين بكروت الـ " Dail Up " فكانت زقرت ونادر من تنقطع
والعموم يمدحها لي ولو انا مقتنع بكلامهم بس هم بفكر شوي لـ حد ما اوصل لليقين
والحلو بعرضهم السنة هذه يوصل السرعة دبل 6 مرات يعني شي حلو .. واسعارهم مناسبة وحلوة
وهذه اهم عروضهم ...
وهذا كان كل الي عندي موضوع مطول بس مفيد للي نواي يغير او يجدد اشتراكه ..
دمتم بود ،،
هناك 5 تعليقات:
الصراحة ماجربت ولا واحد فيهم، كنت أستخدم من شركة اسمها (غلوبل دايركت) وتعذبت وياهم عدل، لأن يوم شغال وعشرة متعطل، وكل ما أتصل عليهم يعدلونه ويرد يخترب مرة ثانية واستمريت 6 شهور على هالوضع، بعدها اشتركت في زين نظام الشريحة الي تحطها بالاب توب او الكمبيوتر وتشبك على كيفك، حيل ارتحت وياها واعتقد ياخذون بالشهر 17 أو 20 د.ك أحسن من الدي اس ال، الدي اس ال حق الي عندهم أخوان او اشخاص وايد يشبكون بالبيت، وبالنسبة لي محد يشبك بالبيت عندنا الا انا..
بس إذا كنت مصصم تاخذ من احدى الشركات الموجودة، خل اختيارك يكون محصور بين " كيمز " أو " كواليتي نت" مع إني أفضل كيمز لأن وايد مريح الي مشتركين وياهم وموفق يارب، وان شالله تختار الي ترتاحله.. أما فاست تلكو وايد شفت من مشتركيها شكاوي..
والله مادري شختار .. انت الحين خليتني في حيرة ؟؟
انا اول شي كان على بالي كوالتي نت وجلف نت !!
ان شاء الله بعد جم يوم اسئل عن عروضهم مره ثانية واتأكد
وتسلم عالمرور
أوافقك بكواليتي بكل حرم
فعلا شركة محترمة وخدمة العملاء عندهم ممتازة
شخصيا استخدم الـ 4 ميغا بس بعد 3 شهور قلت برفع الإشتراك للـ 24 ميغا
وطبعا الـ 24 ميغا مو كل المناطق تدعمها
طلعت منطقتنا تدعم فقط 9 ميغا الا بطريقة وحده تقدر تخليه يوصل 24
وهي انك تشبك رقمين تلفون ويعطيك الحد الأعلى
وان شاء الله السنة اليايه تجديد مع كواليتي للـ 24
بس تبي نصيحتي خل اشتراكك معاهم يتزامن مع معرض الإتصالات نفس حالتي كل شهر 2 ينتهي اشتراكي وأروح المعرض وألقاهم مسوين عرض وأشترك مره ثانيه
الحمدلله منطقتنا تدعم اكثر من الـ 9 ميغا .. اعتقد يسمونها الالياف الضوئية .. Viper DSL
فـ راح اجرب 4 ميغا وبعدين اجرب الـ 24 ميغا ان شاء الله .. عشان احكم في الفرق
وتسلم عالمرور جبيبي
إرسال تعليق